Albin Kurti në Stokholm

Shkruan: Shqiptar Oseku

Stokholm, 17 qershor - Profili më i njohur i VETËVENDOSJE!-s, Albin Kurti, e vazhdoi sot turneun e vet nordik në Suedi. Kurti u prit me dyer të hapura në parlamentin si dhe në ministrinë e jashtme suedeze, ku takoi parlamentarë të të dy blloqeve dhe zyrtarë të lartë. Dhe, sa habi, ai nuk u quajt asnjëherë “ekstremist”, po përkundrazi gjeti mirëkuptim e solidarizim - ndonëse foli krejt njësoj siç bën edhe në Kosovë!

Kosova s’gëzon sovranitet, as integritet territorial, as zhvillim. Pakoja Ahtisari po e çimenton ndarjen etnike të Kosovës. Decentralizimi nuk po bëhet për t’ia afruar vendimmarrjen qytetarëve, por po copëton mjedise të përziera për të krijuar komuna të pastra etnike. Privatizimi po bëhet në kohë të krizës globale, pa transparencë, pa strategji të qartë, e pa analizë socioekonomike – Kosovës s’po i mirren sall vezët e arta, por edhe pula që i bën ato. Paratë nga privatizimi s’po investohen në Kosovë. Të vetmit që po fitojnë janë disa politikanë, që rastis të jenë njerëzit më të pasur në Kosovë. Ata kanë aleancë interesi me funksionarët ndërkombëtarë. Këta gëzojnë pushtet kolonial, pa llogaridhënie kundrejt qytetarëve, e me imunitet ligjor ndaj ligjeve që i kanë sajuar vetë. Mesazhi i Albin Kurtit për mikpritësit suedezë ishte i qartë. Suedia, përmes pjesëmarrjes së vet në EULEX, po sharron në një mision tipik kolonial.



Këtë mesazh, Albin Kurti ua dha në mënyrë identike si partive të djathta qeveritare, ashtu edhe opozitës së majtë. Prej partive qeveritare, Albin Kurti u prit nga Fredrik Malm dhe Birgita Olson nga Partia Liberale, Gustav Blikst nga Partia Konzervative, dhe Kerstin Palm nga Partia Centriste e djathtë, kjo e fundit anëtare e Këshillit të Evropës. Prej opozitës, atë e pritën Hans Linde nga Partia e Majtë, Bodil Caballios dhe Hokan Sundberg nga Partia e Blertë, si dhe Urban Ahlin nga Partia Socialdemokratike, zëvendëskryesues i komisionit parlamentar për politikë të jashtme, e i dizajnuar si ministër i jashtëm nëse i fiton opozita zgjedhjet e shtatorit 2010. Në ministrinë e jashtme suedeze, ai u prit nga Lars Wahlund, shef për BE dhe dora e djathtë e ministrit Karl Bilt; nga Osa Pehrson, referente për Kosovën; si dhe nga Arba Kokalari, këshilltare konzervative me origjinë shqiptare pranë ministrisë.

Të gjithë mikpritësit pa dallim shfaqën mirëkuptim për problemet e përmendura nga Albin Kurti. Dhe të gjithë pa dallim u solidarizuan me pozitën e vështirë të qytetarëve të Kosovës, që i vuajnë pasojat e tyre.

- Ishte kënaqësi të flasësh me njerëz normalë, qe komenti lakonik i Albin Kurtit pas takimeve.

I pyetur nga mikpritësit se ç’mendonte se duhet ndryshuar në politikën rreth Kosovës, Albin Kurti i dha tri propozime konkrete. E para, që Serbisë t’i thuhet se s’do të pranohet në BE gjersa kjo ta njeh Kosovën, e gjersa të heq dorë nga financimi i enklavave. E dyta, që EULEX-i të afatizohet dhe të zhveshet prej mandatit kolonial. Si dhe e treta, që politikat rreth Kosovës të mos kondicionohen më për menaxhim krize, po për zhvillim socioekonomik.

Me kërkesën e Albin Kurtit, në takime mori pjesë edhe Arbër Ibrahimi, politikan lokal nga Lugina e Preshevës, i zgjedhur më 2006 si këshilltar komunal në komunën e Bujanocit. Arbër Ibrahimi është azilant në Suedi, pasi kundër tij është hapur proces gjyqësor në Serbi shkaku se e ngriti flamurin shqiptar në godinën e kuvendit të komunës së Bujanocit më 28 nëntor 2006. Prania e tij në takim shërbeu pë të ilustruar se çfarë dallimi që ekziston në trajtim të minoriteteve në Serbi dhe në Kosovë, por edhe në qasjen e bashkësisë ndërkombëtare.
Arbër Ibrahimi pati rast të njoftonte vetë detajisht miqtë suedezë për abuzimet dhe diskriminimin që u bëhen shqiptarëve në Luginën e Preshevës, si dhe për shkeljen që po u bën Serbia neneve të marrëveshjes së Konçulit, të negociuar më 2001 nga Piter Faith.
Vizita e Albin Kurtit u organizua nga Qendra për vetëvendosje në Stokholm, me ndihmën e zt. Anders Vesman, Lidhja e Miqësisë Suedi-Kosovë